Arslan.mn

Цагдаа, Дотоодын цэргийн байгууллагын удирдах ажилтны сургалт, зөвлөгөөн энэ сарын 17-18-ны өдрүүдэд амжилттай зохион байгуулагдаж өндөрлөлөө.

Зөвлөгөөний нээлтэд Монгол Улсын Ерөнхийлөгч У.Хүрэлсүх, ХЗДХ-ийн сайд Б.Энхбаяр нар оролцож, нийт удирдах ажилтнуудад иргэд, олон нийтийн аюулгүй байдлыг сахин хамгаалах, мэргэжлийн чиг үүргээ гүйцэтгэхэд бодлогоор дэмжиж ажиллахаа илэрхийллээ. Мөн урилгаар  УЕПГ, АТГ, ШШГЕГ, ХЭҮК, ШШЕГ, ГЕГ-ын удирдлагууд оролцож, мэдээлэл хийсэн юм. 

2024 оны Удирдах ажилтны зөвлөгөөнийг хааж ЦЕГ-ын дарга, Дотоодын цэргийн командлагч Т.Сүхболд нийт удирдах ажилтнууд, бие бүрэлдэхүүнд хандан энэ онд хүрэх үр дүн, хэрэгжүүлэх зорилтуудыг танилцууллаа. 

ЦЕГ-ын даргын илтгэлээс тоймлон хүргэвэл : 

- Хүний нөөцийн бодлогыг хэрэгжүүлэхдээ шударга, ил тод, нээлттэй сонгон шалгаруулалт зарлаж шаардлагатай албан тушаалд томилно. Цагдаагийн байгууллага түүхэндээ анх удаа хэлтсийн даргаас дотоодын цэргийн ангийн захирагчийн гээд 10 удирдах албан тушаалд нээлттэй сонгон шалгаруулалтыг зарлаж, тусгай шалгалтыг зохион байгуулсан. Энэ нь туршлагатай, чадвартай хэн бүхэнд мерит зарчмаар дэвших боломжийг улам нэмэгдүүлж өгч байна. 

- Ажлаа мэддэг, туршлагатай алба хаагчдад бүх ачааллыг үүрүүлдэг нь аль ч газарт асуудалтай тогтолцоог бий болгож байна. Энэ байдалд өөрчлөлт хийж, дунд шатны удирдлагын манлайлал, мэргэшсэн байдлыг дээшлүүлэх чиглэлээр үр дүнд хүрэхүйц ажил, арга хэмжээ зохион байгуулж ажиллана.

- Цагдаа, дотоодын цэргийн байгууллагын үйл ажиллагаа нь хүний эрхийг хамгаалах төдийгүй бүх шатанд шинжлэх ухаан, судалгааны үндэслэлийг удирдлага болгох, гэмт хэрэг, зөрчлөөс урьдчилан сэргийлэх ажлыг дүн шинжилгээнд суурилсан шинжлэх ухааны үндэслэлтэй зохион байгуулах, мэдээлэл, техник, технологийн шинэчлэлийг тасралтгүй хийх, Монгол Улсын иргэд, хуулийн этгээдийн зөрчигдсөн эрхийг сэргээх, хамгаалах зарчмыг баримтална. Мөн үйл ажиллагааны бодлого стратеги, арга зүй, шинэчлэлийг тууштай хэрэгжүүлэх зорилгыг удирдлага болгоно.

- Цагдаагийн байгууллага хуульд заасан үндсэн чиг үүргээ биелүүлэхэд хиймэл оюун ухаанд суурилсан технологийн шийдлийг үйл ажиллагаандаа нэвтрүүлж, хүч хэрэгслээ шаардлагатай газарт зөв, оновчтой хуваарилан ажиллуулж, замын хөдөлгөөний аюулгүй байдлыг хангах, гэмт хэрэг, зөрчлийг хугацаа алдалгүй илрүүлж, хүний оролцоогүй 24 цагийн турш хяналт тавих технологи буюу камерын нэгдсэн хяналтын төвийг байгуулах зайлшгүй шаардлага гарч байна.

- Цахим гэмт хэрэгтэй хэрхэн тэмцдэг, хязгааргүй интернэт орчинд иргэдийн эрхийг хэрхэн хамгаалах, учирсан хохирлыг төлүүлэх боломж бүрдүүлэх зорилгоор шаардлагатай гүйлгээ зэргийг царцаах талаар Малайз, Сингапур, Финланд улсын туршлагыг судлахад, манай цахим гэмт хэргийн гаралтын түвшин Сингапур Улсынхтай төстэй байна. Тиймээс Сингапур Улсын туршлага дээр тулгуурлан цахим гэмт хэргээс урьдчилсан сэргийлэх, гэмт хэргийг таслан зогсоох зорилгоор Кибер гэмт хэрэгтэй тэмцэх төвийг нээсэн нь чухал алхам болсон. Цаашид үйл ажиллагааг нь илүү боловсронгуй болгоход анхаарч, иргэдээ гэмт хэрэг, зөрчилд өртөж хохирохоос урьдчилан сэргийлэх, өртсөн тохиолдолд хохирлыг барагдуулах бүхий л боломж нөхцөлийг бүрдүүлэхийн төлөө холбогдох байгууллагуудтай хамтран ажиллах болно.

- Алба хаагчдыг энхийг сахиулах ажиллагаанд гурван төрлөөр хамруулж, хүрээг нь өргөжүүлнэ. Хэлний мэдлэгээ дээшлүүлэхэд нь анхаарч ЦЕГ дэргэдээ хэлний сургалтын төвийг байгуулна. Цагдаагийн алба хаагч бүр англи хэлний суурь мэдлэгтэй байх боломжийг бүрдүүлнэ. 

- Гэмт хэргээс урьдчилан сэргийлэх "Ногоон бүс" төслийн хүрээнд энэ онд шинээр нийслэлийн 74 хороо, мөн аймаг орон нутгийн хэмжээнд камержуулах  бэлтгэл ажлууд шийдэгдсэн. 

- Интерполын чиглэлээр Монгол Улсын цагдаагийн байгууллага идэвх санаачлагатай ажиллаж, бусад гишүүн улсаа тэргүүлэн манлайлж байгааг Олон улсын интерполын зүгээс удаа дараа талархаж байгаа. Бид энэ онд ч мөн амжилтаа ахиулахын төлөө ажиллаж,  өнгөрсөн оны 12 дугаар сард үндэстэн дамнасан зохион байгуулалттай гэмт хэрэгтэй тэмцэх чиглэлээр баталсан гурван баримт бичгийн хүрээнд хэрэгжилтийг хангаж ажиллана хэмээн онцоллоо. 

2024 онд Цагдаа, Дотоодын цэргийн анги байгууллагаас дэвшүүлсэн ГУРВАН ЗОРИЛТ  :

• Гэмт хэргээс урьдчилан сэргийлэх ажлыг эрчимжүүлж, гадаад харилцаа, хамтын ажиллагааг өргөжүүлнэ
• Алба хаагч, ажилтны эрх, хууль ёсны ашиг сонирхол, эрүүл мэндийг хамгаалж, нийгмийн баталгааг хангана.
• Цахим шилжилтэд манлайлж, үйл ажиллагаандаа инноваци, шинэ технологи нэвтрүүлж бүтээлчээр ашиглана.