Arslan.mn

"Парис-2024" зуны олимп 2024 оны 7 сарын 26-ны өдөр Парисын Сена мөрний эрэгт эхлэх билээ. Энэ удаагийн зуны олимпод оролцох Монголын үндэсний шигшээ баг тамирчдын өмсөх ёслолын хувцсыг үндэсний брэнд үйлдвэрлэгч MICHEL AMAZONKA компани урлахаар болжээ. 

MICHEL AMAZONKA компанийн хувьд "Токио-2020" зуны олимп болон "Бээжин-2022" өвлийн олимпод оролцсон Монголын баг тамирчдын хувцсыг урлаж байсан туршлагатай бөгөөд Бээжингийн олимпод зориулж хийсэн хувцас нь Олон улсын олимпын хорооны музейд хадгалаастай байдаг. 

Michel&Amazonka брэндийн ерөнхий менежер Б.Мөнхбаяр энэхүү Парис-2024 зуны олимпын хувцас урлахтай холбоотойгоор "Парис өөрөө загварын хот. Тиймээс Хийц нэлээд дэгжин байх ёстой. Орчин үеийн хэв шинжийг харуулсан, бидний гол ялгарч байгаа зүйл нь хантааз, хатгамлын онцлог байгаа юм. Монгол үндэсний бахархал болох 9 хөлт цагаан туг, олимпын бамбар, хатдын өлзий хээ болон алхан хээ, нар сар гэх мэт олон зүйлсийг хатгамлаар хийж өгч байгаагаараа илүү онцлог болж байгаа гэж үзэж байна. Гар ажиллагаа нэлээд их шаардаж байгаа учраас нэг тамирчны иж бүрэн хувцсыг урлахад 5 хоног шаардахаар байна" хэмээн ярьсан юм.