Arslan.mn

Хар тамхи мансууруулах бодистой холбоотой гэмт хэргийн нөхцөл байдлын талаар цагдаагийн байгууллагаас мэдээлэл хийлээ. 

Энэ үеэр ЦЕГ-ын Хар тамхитай тэмцэх газрын хэлтсийн дарга Б.Батхуяг "Их хэмжээний мансууруулах бодисыг Дархан-Уул аймгаас хууль бусаар олж авч, Улаанбаатарт худалдан борлуулдаг Монгол Улсын иргэн нэр бүхий таван этгээдийг энэ сарын 4-нд дайчлан баривчилж, мөрдөн байцаах ажиллагааг явуулж байна. Тус хэрэгт эмнэлгийн байгууллагын ажилтан оролцсон байж болзошгүй" гэлээ.

Мөн Монгол Улсын нэр бүхийн 9 иргэн бүлэг зохион байгуулалтад орж, синтетик төрлийн их хэмжээний мансууруулах бодисыг Өмнөговь аймгийн Ханбогд сумын хилийн боомтоор БНХАУ-аас нүүрс тээврийн хэрэгсэл ашиглаж, Монгол Улсад нэвтрүүлж, худалдан борлуулж байсан гэмт хэргийг энэ оны тавдугаар сарын 30-ны өдөр илрүүлж, холбогдох мөрдөн шалгах ажиллагааг явуулж байгаа аж. Эдгээр этгээдүүд өмнө нь мөн энэ төрлийн гэмт хэрэгт холбогдон шалгагдаж байжээ.

Өөрөөр хэлбэл, зургаадугаар сарын 4-6-ны хооронд 19 хүн хар тамхины хэрэгт холбогдон шалгагдаж байна. Үүний гуравт нь цагдан хорих, таслан сэргийлэх арга хэмжээ авчээ.