Arslan.mn

Л.Оюун-Эрдэнийн Засгийн газар 2025 оны улсын төсвийн төсөлд хувийн хэвшлийг татварын бодлогоор дэмжихээр тусгасан. Энэ хүрээнд Аж ахуйн нэгжийн орлогын албан татварын тухай хуульд нэмэлт, өөрчлөлт оруулах тухай хуулийн төслийг баталсан юм. Тус хуулийн төсөлд ААН, байгууллагуудыг дэмжих томоохон заалт орсон бөгөөд “Хувийн хэвшил нийгэмд чиглэсэн хөрөнгө оруулалт хийж, санхүүгийн дэмжлэг үзүүлбэл борлуулалтын орлогын 1 хувь хүртэлх хэмжээгээр татварын хөнгөлөлт үзүүлнэ.” гэх заалт нь нийгмийн сайн сайхны төлөө бүтээн байгуулалт хийдэг олон ААН, байгууллагуудад боломжийг нээж өгсөн юм. 

Тэгвэл өнөөдөр Татварын Ерөнхий газар, Монголын үндэсний худалдаа аж үйлдвэрийн танхим хамтран Монгол Улсад үйл ажиллагаа эрхэлж буй шилдэг 100 компанийн төлөөллүүдийг урьж, хуульд орсон нэмэлт өөрчлөлт, ААН-үүдэд ямар ээлтэй байх талаар уулзалт, хэлэлцүүлгийг зохион байгууллаа.

Хэлэлцүүлэгт Татварын Ерөнхий газрын дарга Ч.Чимидсүрэн, Монголын үндэсний худалдаа аж үйлдвэрийн танхимын гүйцэтгэх захирал Т.Дүүрэн, ТЕГ-ын Том татвар төлөгчийн газрын дарга С.Төгсжаргал болон бусад албаныхан, ААН-ын төлөөллүүд оролцлоо.

Уулзалтыг нээж, Татварын Ерөнхий газрын дарга Ч.Чимидсүрэн хэлсэн үгэндээ “Монгол Улсын Засгийн газраас татварын асуудлыг томоор харж, нийгмийн сайн сайхны төлөө бүтээн байгуулалт хийж буй ААН байгууллагуудад татварын хөнгөлөлтийг үзүүлэх, дэмжин ажиллах зорилтыг тавин ажиллаж байна. Монголын татварын алба татвар төлөгч иргэн, ААН-үүдийг мэдээ, мэдээллээр хангах, төсөв бүрдүүлэх, татварын хуулийн хэрэгжилтэд хяналт тавих гэсэн гурван чиглэлээр үйл ажиллагаагаа эрхэлдэг. Тэгвэл өнөөдөр нэгдүгээр чиг үүргийн хүрээнд 2025 оны улсын төсвийн төсөлд хувийн хэвшлийг татварын бодлогоор дэмжихээр тусгасан хуулийн өөрчлөлтийг танилцуулахаас гадна хуулийг дагаж өөрчлөгдөх дүрэм, журамд санал авах, гарах хүндрэлийг хэрхэн даван туулах талаар танилцуулах хэлэлцүүлгийг зохион байгуулж байна.

Өмнө нь ААН, байгууллагуудын нийгэмд чиглэсэн хандив, үйл ажиллагааг зөвхөн хасагдах зардлаар бүртгэж явдаг байсан бол энэ хууль батлагдсанаар ААН, байгууллагын оруулсан дүнгийн хэмжээгээр татвар төлөх дүнгээс хасч тооцох боломжтой болсон. Өөрөөр хэлбэл ААН-үүд татвар төлөх үү эсвэл байгууллагын зорилгод нийцэх нийгэмд эерэг үйл ажиллагааг зохион байгуулах уу гэдэг сонголтыг хийх боломжтой болсон. Үүнийгээ дагаад нийгэмд эерэг үр дүн маш их гарна гэж харж байна." хэмээлээ. 

Мөн тэрээр "Хувийн хэвшлийн байгууллага, ААН нь нийгмийн хариуцлагын хүрээнд хуульд заасан байгалийн нөөцийг хамгаалах, нөөц нэмэгдүүлэх, цөлжилтийг сааруулах, ахмад настан, хөгжлийн бэрхшээлтэй иргэн, хүүхдийн асрамжийн үйлчилгээ, тэдгээрийн эрхийг хамгаалах, соёлын өвийг хамгаалах, сэргээх, нийтийн эзэмшлийн зам, талбай, цэцэрлэгт хүрээлэн барьж байгуулах, зэрэг нийгэмд чиглэсэн хөрөнгө оруулалт, санхүүгийн дэмжлэх, хандив үзүүлсэн бол тухайн зардлыг албан татвараас хасаж, хөнгөлөлт үзүүлнэ" гэдгийг энэ үеэр онцоллоо. 

ТЕГ-ын Том татвар төлөгчийн газрын дарга С.Төгсжаргал:

Сүүлийн жилүүдэд томоохон татвар төлөгч байгууллагууд нийгмийн хариуцлагын хүрээнд боловсрол, эрүүл мэнд, дэд бүтцийг сайжруулах чиглэлээр томоохон хөрөнгө оруулалт, бүтээн байгуулалтыг хийх, санхүүгийн дэмжлэг, тусламж үзүүлэх ажлыг ихээр хийх болсон. Тиймээс эдгээр ААН, байгууллагуудаа татварын бодлогоор дэмжих зорилгоор хуулинд өөрчлөлт оруулсан. Өнөөдрийн уулзалтад Монгол Улсад үйл ажиллагаагаа эрхэлж буй томоохон 100 гаруй байгууллагын төлөөллүүд оролцож байна. Татварын байгууллагаас хуулийг хэрэгжүүлэхтэй холбоотой дүрэм, журам, нарийвчилсан зохицуулалтуудыг хэрэгжүүлдэг бөгөөд өнөөдрийн хэлэлцүүлгийн үеэр хуулийг илүү ил тод, ойлгомжтой хэрэгжүүлэх зорилгоор татвар төлөгч нараас санал авч, дүрэм журмандаа тусгах юм.

АПУ-ын Санхүү эрхэлсэн захирал Г.Энхбилэг: 

Хувийн хэвшил нийгэмд чиглэсэн хөрөнгө оруулалт хийж, санхүүгийн дэмжлэг үзүүлбэл борлуулалтын орлогын 1 хувь хүртэлх хэмжээгээр татварын хөнгөлөлт үзүүлнэ гэх хуулийн заалтын анхны танилцуулга уулзалт боллоо. Танилцуулгаас төр, хувийн хэвшлийн байгууллагууд хамтарч нийгмийн сайн сайхны төлөө төсөл хөтөлбөрийг хэрэгжүүлэх боломжтой болжээ гэж харж байна.

Энэ нь том төсөл хөтөлбөр хэрэгжүүлдэг компаниудад маш том дэмжлэг болж байна гэж харж байна. Өмнө нь том төсөл хөтөлбөр хэрэгжүүлэх зардал нь татвар ногдох зарлагад тооцогддоггүй байсан. Тус хууль батлагдсанаар хувийн компаниуд нийгмийн сайн сайхны төлөө илүү их ажлыг хийх, төсөл хөтөлбөрийг хэрэгжүүлэх боломжтой боллоо гэж харж байна.

Ойрын 10 жилд төр, хувийн хэвшил хамтран томоохон бүтээн байгуулалтыг хийж болохоор боллоо гэж харж байна.