Arslan.mn

Нийслэлийн хэмжээнд приүс машины нүүрсэн яндан хулгайд алдсан дуудлага сүүлийн жилүүдэд нэмэгдсэн талаар цагдаагийн байгууллагаас мэдээлдэг. Уг яндан өнөөдрийн байдлаар зах зээл дээр 800.000 төгрөгөөс 1.3 сая төгрөгийн үнээр зарагдаж байна.

Тэгвэл нүүрсэн яндан буюу катализаторгүй тээврийн хэрэгсэл 300 орчим хорт бодис ялгаруулж, агаар бохирдуулдаг аж. ЦУОШГ болон холбогдох мэргэжлийн бусад байгууллагуудын хийсэн судалгаагаар Улаанбаатар хотын агаар дахь хүнд металлын хэмжээ хүлцэх хэмжээнээс 25 дахин их байна гэсэн дүгнэлт гарсан байдаг. Өөрөөр хэлбэл нүүрсэн яндангүй машин хилээр оруулж буй ченжүүд болон урт гартай хулгайч нар Улаанбаатарчуудын агаарын бохирдолд үлэмж хэмжээний хор хохирол учруулж байна гэсэн үг.

Улмаар нүүрсэн яндангүй машиныг хөдөлгөөнд оролцуулахгүй байх шийдвэр гарсан талаар ТЦА-аас мэдэгдсэн. Тэгвэл уг мэдээлэлтэй зэрэгцэн цахим орчинд нүүрсэн яндан түрээслэх далд бизнес цэцэглэж эхэлжээ. Тодруулбал фэйсбүүк сүлжээнд оношилгоонд орох машинд 100-200 мянган төгрөгөөр нүүрсэн яндан түрээслүүлнэ гэх зар олширчээ.

Ташрамд дуулгахад Тээврийн цагдаагийн албанаас хийсэн хяналт, шалгалтаар 1000 гаруй тээврийн хэрэгслээс нүүрсэн яндангүй 400 гаруй тээврийн хэрэгсэл илэрсэн байна.