Arslan.mn

1993 онд ЮНЕСКО-ийн Ерөнхий бага хурлын 27 дугаар чуулганаар жил бүрийн 3 дугаар сарын 22-ны өдрийг “Дэлхийн усны өдөр” болгон тэмдэглэж байхаар тунхагласан. Үүнээс хойш уг өдрийг жил бүр өөр өөр сэдвийн дор дэлхий нийтээр тэмдэглэн өнгөрүүлдэг уламжлалтай болсон.

Тэгвэл Орон сууц нийтийн аж ахуйн удирдах газраас энэ жил хэрэглэгчдэд хүрч үйлчлэх, иргэдэд мэдээлэл өгөх зорилгоор "НЭЭЛТТЭЙ ХААЛГАНЫ ӨДӨРЛӨГ"-ийг зохион байгууллаа. 

Өнөөдөр Хэрэглэгчдэд үйлчлэх төв-6-ын хамт олон Чингэлтэй дүүргийн 9, 10 дугаар хорооны иргэдэд мэдээлэл, зөвлөгөө өглөө. Энэ үеэр ОСНААУГ-ын ХҮТ-6 төвийн ахлах инженер Д.Наранчимэг "ОСНААУГ нь гурван түгээх төв, хэрэглэгчдэд үйлчлэх 19 төвтэйгөөр үйл ажиллагаагаа явуулж байна. Дэлхийн усны өдөр"-ийг тохиолдуулан Чингэлтэй дүүргийн зарим хороодын иргэдэд мэдээлэл, зөвлөгөө өгч ажиллаж байна. Мөн аж ахуй нэгж, айл өрхийн гэрээг энэ үеэр хийж байна. Орон сууцны иргэдийн хувьд гэр хорооллын иргэдээс хэд дахин их ус хэрэглэдэг. Тиймээс эхний ээлжинд усны зөв хэрэглээгээ хянах, гамнах тал дээр анхаарах хэрэгтэй. Үүнээс гадна иргэд суултуурт 00 цаас, хүүхдийн живх, хог, хоолны үлдэгдэл хийж, бөглөх тохиолдол их байдаг. Тиймээс иргэд энэ тал дээр анхаарч, хогийг хогийн савандаа л хийх хэрэгтэй" хэмээх зөвлөгөөг энэ үеэр иргэдэд өгч байлаа. 

"Бидний үйлчилгээ Таны ая тухын баталгаа" уриатайгаар ажилладаг ОСНААУГ нь энэ онд "ХЭРЭГЛЭГЧИЙН ТӨЛБӨР ТООЦООГ" хялбар хийлгэх зорилгоор BILLER.UBKONTOR.MN платформыг үйлчилгээндээ нэвтрүүлжээ. 

Хэрэглэгч та тус платформыг ашиглан 

• Хэрэглээний төлбөрийн дэлгэрэнгүй мэдээллийг харах 
• И-БАРИМТАА бүртгэлтэй и-мэйл хаягруугаа авах 
• Дурын банкаараа төлбөр тооцоогоо хийх 
• Тоолуурын мэдээллээ цахимаар илгээх 
• Хэрэглээтэй холбоотой мэдээлэл хүлээн авах 
• Ухаалаг хэрэглээний талаарх заавар, зөвлөгөөг авах боломжтой аж.