Arslan.mn

Гаднаас цэргийн аюул нүүрлэсэн тохиолдолд Орос улс бидний анхны хүсэлтээр манай улсын аюулгүй байдлыг хангахад тусламж үзүүлнэ гэж Беларусийн Ерөнхийлөгч Александр Лукашенко мэдэгдлээ.

А.Лукашенко Оросын Ерөнхийлөгч В.Путинтэй бямба гарагт утсаар ярьсан бөгөөд энэ үеэр хоёр тал дээрх тохиролцоонд хүрчээ.

Тэрбээр Беларусийн Батлан хамгаалах яамны Стратегийн удирдлагын төвд болсон зөвлөгөөнд оролцож үг хэлэхдээ “цэрэг батлан хамгаалахын тухайд гэвэл, Холбооны улс ба Хамтын аюулгүй байдлын гэрээний байгууллагын хүрээнд ОХУ-тай байгуулсан гэрээ бий, би ОХУ-ын Ерөнхийлөгчтэй үүссэн нөхцөл байдлын талаар нэлээд нухацтай удаан ярилцсан” гэж онцлон дурдлаа.   

Мөн улс орондоо өрнөж буй эсэргүүцлийн хөдөлгөөнийг дарахад туслахыг Беларусийн ерөнхийлөгч Александр Лукашенко ОХУ-ын ерөнхийлөгч Владимир Путинээс хүссэн байна.

Харин ОХУ-ын Ерөнхийлөгч Владимир Путин Беларусь улсад өрнөөд буй үймээнийг намдааж, аюулгүй байдлыг хангахын тулд Ерөнхийлөгч Александер Лукашенкод туслахыг зөвшөөрсөн гэжээ.