Arslan.mn

Украины хилийн ойролцоох Польшийн нутаг дэвсгэрт хоёр пуужин унасны улмаас Польшийн хоёр иргэн амиа алджээ. Үүнтэй холбогдуулан Польшийн Засгийн газар шуурхай хуралдаж, цэргээ өндөржүүлсэн бэлэн байдалд шилжүүлэх шийдвэрийг гаргасан байна.

Польшийн Ерөнхийлөгч АНУ-ын Ерөнхийлөгчтэй холбогдож болсон явдлын талаар хэлэлцсэн гэдгийг Польшийн Ерөнхийлөгчийн хэвлэлийн төлөөлөгч мэдээллээ. 

Украины Ерөнхийлөгч Володимир Зеленский өчигдөр орой хийсэн мэдэгдэлдээ “Өнөөдөр Оросын пуужин манай найрсаг харилцаатай хөрш орны нутаг дэвсгэрт уналаа. Амь үрэгдсэн хүмүүсийн ар гэрийнхэнд Украины ахан дүүс гүн эмгэнэл илэрхийлье.” гэлээ.

Харин ОХУ Украины энэ мэдэгдлийг эрс няцааж “Нөхцөл байдлыг хурцатгах зорилгоор  ОХУ-ын эсрэг санаатай явуулсан өдөөн хатгалага” гэж үзэж байгаагаа мэдэгджээ.